Tá Familjufyrisitingin til dømis skal taka avgerð um, hvar tú skalt búgva, hevur tú rættin til at fáa sjónarmið lýst. Tað merkir ikki, at tú ræður. Men tú hevur rættin til at siga tína meining og fáa títt sjónarmið lýst. Tað er eisini tí, at tú verður boðin til barnasamrøðu, um foreldur tíni eru ósamd um, hvar tú skalt búgva, ella hvussu nógv tú skalt vera hjá tí foreldrinum, sum tú ikki býrt hjá. 

Rætturin at fáa títt sjónarmið lýst er eisini tryggjaður við barnarættindasáttmálanum. Barnarættindasáttmálin tryggjar tær eisini rættin at verða hoyrd ella hoyrdur og at siga tína meining. Og barnarættindasáttmálin skal millum annað tryggja, at vaksin gera tað, sum er best fyri børn, og at vaksin virða meiningina hjá børnum.

Tú hevur rætt til at hava ein hjásita við, tá tú kemur til samrøðu ella fund í Familjufyrisitingini. 

Ein hjásiti er ein vaksin persónur, sum tú ert trygg/ur við. Foreldur tíni kunnu ikki vera tín hjásiti, tí at tey hava biðið um hjálp frá Familjufyrisitingini, og tí at tú skalt kunna siga júst tað, tú hugsar.

Um tú vilt hava ein hjásita við til barnasamrøðuna, kanst tú eitt nú tosa við ráðgevan um hetta, tá tú kemur í Familjufyrisitingina til fyrireikandi prátið at heilsa upp á ráðgevan og at síggja hølini, har samrøðan fer at verða hildin.

Tá tú ert yngri enn 18 ár, er tað tann ella tey, sum hava foreldramyndugleika yvir tær, sum skulu tryggja, at tú hevur tað gott. Foreldramyndugleikahavar kunnu tí virka og handla tína vegna. Tað vil siga, at tann ella tey við foreldramyndugleika umboða teg og taka týðandi avgerðir fyri og um teg.

Um foreldur tíni hava biðið Familjufyrisitingina hjálpa teimum, tí at tey eru ósamd um bústaðin hjá tær, ella hvør samveruskipan skal vera galdandi fyri teg, hevur Familjufyrisitingin stovnað eitt sokallað samveru- ella bústaðarmál í okkara telduskipan. 

Í hesum máli goyma vit alla kunning um málið. Vit goyma til dømis teldupostar, sum foreldur tíni hava sent okkum. Vit goyma frágreiðingar frá fundum við tíni foreldur. Og vit goyma eisini frágreiðing frá tíni barnasamrøðu í hesum málinum. Hesar upplýsingar hjálpa okkum at taka avgerð um, hvat er best fyri teg. 

So leingi tú ert undir 18 ár, so ert tú ikki at rokna sum ein beinleiðis partur í málinum. Hinvegin eru foreldur tíni beinleiðis partar í málinum. Partar í málinum hava rætt til at síggja tær upplýsingar, sum vit goyma í málinum. Hetta rópa vit rættin til innlit. 

Men hóast tú ert eitt barn undir 18 ár og ikki ert beinleiðis partur í málinum eins og foreldur tíni, so kanst tú hava rætt til innlit eisini. Tað veldst millum annað um, hvussu nógv ár tú ert, og møguliga eisini hvussu búgvin tú ert. 

Um tú ert yvir 15 ár, verður tað aloftast mett, at tú ert nóg gomul ella gamal at fáa innlit í upplýsingarnar í einum samveru- og/ella bústaðarmáli um teg. 

Og tá tú ert vorðin 18 ár, kanst tú altíð venda tær til okkara og biðja um at síggja tær upplýsingar, sum Familjufyrisitingin hevur í einum bústaðar- og/ella samverumáli um teg. Eisini hóast, tú vart væl yngri, tá málið var viðgjørt í Familjufyrisitingini.